សេចក្តីបំភ្លឺ របស់ប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម ទាក់ទិននិងករណីមាន់ជល់ នៅស្រុកស្ទឹងត្រង់

 

កំពង់ចាម÷សូមជម្រាបជូនសាធារណជនទាំងអស់ជ្រាបថា នៅថ្ងៃសុក្រ ទី២២ ខែសីហា ឆ្នាំ២០២៥នេះ ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម បានទទួលព័ត៌មានពីបងប្អូនប្រជាពលរដ្ឋ និងអ្នកសារព័ត៌មានថា មានសកម្មភាពលួចលេងល្បែងសុីសងខុសច្បាប់ ជល់មាន់ភ្នាល់ដាក់ប្រាក់មួយកន្លែង ស្ថិតក្នុងចំណុចព្រៃចម្ការស្វាយចន្ទីរ ស្ថិតក្នុងភូមិឈើទាល ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម។

 ភ្លាមៗនោះ ដោយអនុវត្តតាមបទបញ្ជាពី លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម កម្លាំងជំនាញ នៃអធិការដ្ឋាននគរបាលស្រុកស្ទឹងត្រង់ ដឹកនាំដោយលោកវរសេនីយ៍ឯក ឯម វឌ្ឍនា អធិការនគរបាលស្រុកស្ទឹងត្រង់ សហការជាមួយសមត្ថកិច្ចពាក់ព័ន្ធ ចុះស្រាវជ្រាវស៊ើបអង្កេតលើករណីនេះ ។ ជាលទ្ធផល ពេលកម្លាំងជំនាញចុះទៅដល់ទីតាំងខាងលើ ពិនិត្យឃើញមានដាន និងស្លាកស្នាមរយៈពេលប្រហែលពីរ ទៅបីថ្ងៃមុន ដែលមានក្រុមញៀនល្បែងលួចលាក់លេងល្បែងសុីសងជល់មាន់ភ្នាល់ដាក់ប្រាក់ចល័តតាមព្រៃចម្ការ។ 

បច្ចុប្បន្ន លោកឧត្តមសេនីយ៍ស្នងការ បានចាត់បញ្ជាឱ្យកម្លាំងក្នុងមូលដ្ឋាន មានការបន្ដការឃ្លាំមើល និងពង្រឹងវិធានការល្បាតត្រួតពិនិត្យក្នុងភូមិសាស្រ្តឱ្យបានម៉ត់ចត់បំផុត ។