ឧកញ៉ាកុកអាន ប្រឈមនិងការចាប់ខ្លួននៅថៃ ក្រោយសមត្ថកិច្ចបង្ក្រាបបទល្មើសអនឡាញ១៩ទីតាំង

ភ្នំពេញ÷យោងតាមបណ្តាញសារព័ត៌មានថៃ បានចេញផ្សាយយ៉ាងទូលំទូលាយអំពីប្រតិបត្តិការបង្ក្រាបបទល្មើសឆបោកតាមអនឡាញនៅប្រទេសថៃ តាមដីកាស្រាវជ្រាវរបស់តុលាការព្រហ្មទណ្ឌ (CCIB) ដោយរកឃើញមានជាប់ពាក់ព័ន្ធជាមួយអ្នកឧកញ៉ា កុក អាន របស់ប្រទេសកម្ពុជា ហើយនៅរសៀលថ្ងៃនេះ ប៉ូលិសថៃនឹងធ្វើសន្និសីទសារព័ត៌មានបញ្ជាក់រឿងនេះ។

សារព័ត៌មាន Khaosod របស់របសប្រទេសថៃ បានផ្សាយនៅមុននេះថា ប៉ូលិសថៃ បានឆ្មក់ចូលឆែកឆេរ ទីតាំង ១៩ កន្លែង ដែលត្រូវបានអះអាងថា ជាកម្មសិទ្ធិរបស់លោក កុក អាន ដោយរឹបអូសរថយន្តប្រណីតៗ និងទឹកប្រាក់២៧ លានបាត (ជាង៨៣ម៉ឺនដុល្លារអាមេរិក) ក្នុងប្រតិបត្តិការរបស់សមត្ថកិច្ចកិច្ចថៃ។ការឆ្មក់ចូលទីតាំងចំនួន១៩កន្លែងនោះដោយមានសង្ស័យថា មានបើកកន្លែងឆបោកតាមអនឡាញ មជ្ឈមណ្ឌលលាងលុយ និងជាមជ្ឈមណ្ឌល ដោយរុះរើបណ្តាញ និងរឹបអូសបានរថយន្តទំនើបៗជាច្រើន និងប្រាក់ចំនួន ២៧ លានបាត ។ទីតាំងចំនួន១៩នោះស្ថិតនៅទីក្រុងបាងកក ខេត្តសាមុតប្រាកាន និងខេត្តឈុនបុរី ក្រោមប្រតិបត្តិការ «Shut Down Money Mule Accounts, Hunt Khmer Capital»។ «Shut Down Money Mule Accounts» សំដៅដល់ការបិទគណនីផ្ទេរលុយខុសច្បាប់ ( Money Mule) ដែលជាប់ពាក់ព័ន្ធខ្លាំងជុំវិញការលាងលុយតាមប្រព័ន្ធអ៊ិនធឺណិត។សេចក្តីរាយការណ៍ដដែល បានលើកឡើងថា អ្នកឧកញ្ញ៉ា កុក អាន ដែលមានរហស្សនាក «បិតាក្រុងប៉ោយប៉ែត» ជាប់ពាក់ព័ន្ធនឹងក្រុមអ្នកលេងនៅមជ្ឈមណ្ឌលឆបោក «Call Center» ។

ក្នុងការឆ្មក់ឆែកឆេរនោះ ទីតាំងសំខាន់មួយដែលត្រូវបានឆែកឆេរនោះគឺផ្ទះមួយកន្លែងក្នុងលំនៅឋានមួយក្នុងតំបន់ Bang Phli ខេត្តសាមុតប្រាកាន (Samut Prakan)។ដីកាស្រាវជ្រាវរបស់តុលាការព្រហ្មទណ្ឌត្រូវបានអនុវត្តដើម្បីស្វែងរកភស្តុតាង និងចាប់ខ្លួន លោក កុក អាន ដែលជាម្ចាស់កាស៊ីណូ Crown Casino Resort (អគារ ២៥ជាន់ និងអគារ ១៨ជាន់ ដែលទីតាំងទាំងនោះជាមូលដ្ឋានមជ្ឈមណ្ឌលហៅទូរស័ព្ទធំនៅក្រុងប៉ោយប៉ែត ដែលចោទថាបានឆបោកប្រជាជនថៃនៅកម្ពុជា។ ឧកញ៉ា កុក អាន ត្រូវបានចោទប្រកាន់ពីបទចូលរួមក្នុងអង្គការឧក្រិដ្ឋកម្មឆ្លងដែន និងការលាងលុយកខ្វក់។ យោងសេចក្តីរាយការណ៍។ការស្វែងរកនេះគឺជាលទ្ធផលនៃដីការបស់ការិយាល័យស៊ើបអង្កេតតុលាការព្រហ្មទណ្ឌ (CCIB) លេខ 172/2568 ចុះថ្ងៃទី ២៦ខែមិថុនា ឆ្នាំ ២០២៥ ដែលបានបង្កើតគណៈកម្មាធិការស៊ើបអង្កេតមួយដើម្បីស៊ើបអង្កេតករណីពាក់ព័ន្ធ។

ករណីទាំងនេះពាក់ព័ន្ធនឹងអង្គការឧក្រិដ្ឋកម្មឆ្លងដែនដែលមានបុគ្គលដែលមានសញ្ជាតិច្រើន ដោយមានការបែងចែកការងារជារចនាសម្ព័ន្ធ។ មជ្ឈមណ្ឌលប្រតិបត្តិការត្រូវបានបង្កើតឡើងនៅទីតាំងផ្សេងៗក្នុងក្រុងប៉ោយប៉ែត ប្រទេសកម្ពុជា ដូចជាអគារ ២៥ជាន់ អគារ១៨ជាន់ អគារ HISO និងកាស៊ីណូក្រោន។ នេះបើយោងតាតាមសេចក្តីរាយការណ៍។ ក្រុមឧក្រិដ្ឋជនបានប្រើប្រាស់ទីតាំងទាំងនេះ ដើម្បីធ្វើការបោប្រាស់តាមប្រព័ន្ធអ៊ីនធឺណិតផ្សេងៗ រួមទាំងការបោកប្រាស់កូនកាត់ មជ្ឈមណ្ឌលហៅទូរសព្ទ និងការលាងលុយកខ្វក់តាមរយៈគណនីបញ្ឆោតប្រាក់ និងរូបិយប័ណ្ណឌីជីថល។ ពលករថៃមួយចំនួនធំត្រូវបានបោកបញ្ឆោតឱ្យធ្វើការជាមេលុយ និងបង្ខំឱ្យស្កេនមុខដើម្បីបញ្ជាក់ពីប្រតិបត្តិការ ហើយមានករណីឃុំខ្លួនបុគ្គលនៅបរទេសដោយខុសច្បាប់។ការស៊ើបអង្កេត បានបង្ហាញថា ជនសង្ស័យគឺឧកញ៉ា កុក អាន ជាជនជាតិខ្មែរជាម្ចាស់អគារដែលត្រូវបានប្រើប្រាស់ដោយក្រុមឧក្រិដ្ឋកម្មឆ្លងដែន ដើម្បីប្រព្រឹត្តបទល្មើស ហើយបានចូលរួមដោយផ្ទាល់ ឬដោយប្រយោលនៅក្នុងសកម្មភាព ឬប្រតិបត្តិការរបស់អង្គការឧក្រិដ្ឋកម្មឆ្លងដែននោះ ដោយដឹងពីគោលបំណងរបស់ខ្លួន៕