មហាជនសំណូមពរដល់លោកស ថេងរ ពិសេសលោកខូយ រីដា មេត្តាជួយបង្ក្រាប ទីតាំងល្បែងស៊ីសង មាន់ជល់អនឡាញ ក្រុមហ៊ុន W88 ក្នុងភូមិសាស្ត្រ ខេត្តពោធិ៍សាត់ ដើម្បីអនុវត្ត នូវគោលនយោបាយ ភូមិ .ឃុំ មានសុវត្ថភាព

 

(ភ្នំពេញ) ៖ ប្រជាពលរដ្ឋរាយការណ៍ថាបច្ចុប្បន្ននេះ មាន់ជល់អនឡាញក្រុមហ៊ុនW88 បាននិងកំពុងបោះទីតាំងជាច្រើនកន្លែងនៅក្នុងភូមិសាស្ត្រខេត្តពោធិ៍សាត់។ ប្រជាពលរដ្ឋបានសំគាល់ឃើញថា អាជ្ញាធរមានសមត្ថកិច្ចហាក់ដូច ជាមិនបានយកចិត្តទុកដាក់ក្នុងការបង្ក្រាបបញ្ហាមាន់ ជល់អនឡាញរបស់ក្រុមហ៊ុនW88 នេះនៅឡើយទេ។ 

ដូច្នេះប្រជាពលរដ្ឋស្នើឲ្យអាជ្ញាធរមានសមត្ថកិច្ច ជា ពិសេសកម្លាំងនគរបាលខេត្ត ចាត់វិធានការបង្ក្រាបផង។ប្រភពរាយការណ៍ថា ទីតាំងមាន់ជល់អនឡាញរបស់ ក្រុមហ៊ុន W88 ១កន្លែងកំពុងដំណើរការនៅភូមិពោធិវង្ស ឃុំកោះជុំ ស្រុកកណ្ដៀង នៅក្រោយវត្តពោធិវង្សប្រហែល៣០០ម៉ែត្រ ដែលមានមនុស្សចូលលេងមិនដាច់នោះឡើយ។ ទីតាំងនេះត្រូវគេប្រាប់ថា បានដំណើរ ការជាយូរណាស់មកហើយ។ ហើយក៏មិនឃើញអាជ្ញាធរមានសមត្ថកិច្ចណាចុះទៅបង្ក្រាបដើម្បីឲ្យប្រជាពលរដ្ឋកក់ក្តៅនោះដែរ។ អ្នកជល់មាន់អនឡាញ នៅតែបន្ត កន្ទុយគ្នាចូលលេងមិនឈប់នោះឡើយ។

ប្រភពរាយការណ៍បន្ថែមទៀតថា នៅឯភូមិចំការជ្រៃខាងត្បូង ឃុំអន្លង់រាប ស្រុកវាលវែង ក៏មានទីតាំងមាន់ ជល់អនឡាញរបស់ក្រុមហ៊ុន W88 កំពុងដំណើរការយ៉ាងគ្រប់គ្រឹកគគ្រេងដូចគ្នានេះដែរ។ ទីតាំងខាងលើនេះគឺបើកដំណើរការជាចំហរដោយមិនញញើតអាជ្ញាធរមានសមត្ថកិច្ចអ្វីនោះឡើយ។ ប្រភពដាក់ការសង្ស័យថាទំនងជាមានការឃុបឃិតគ្នា រវាងក្រុមហ៊ុនមាន់ជល់អនឡាញ W88 ជាមួយអាជ្ញាធរមានសមត្ថកិច្ចនោះហើយទើបអាចដំណើរការបានជាចំហរយ៉ាងនេះ។ 

ការរំពឹងទៅលើអាជ្ញាធរមូលដ្ឋានឃុំនិងស្រុកក៏ដូចជានាយប៉ុស្តិ៍ឬអធិការស្រុក មិនអាចមកបង្ក្រាបទីតាំងល្បែងស៊ីសងទាំងនេះបានឡើយ។ ប្រជាពលរដ្ឋរង់ចាំមើលថាតើកម្លាំងនគរបាលខេត្តពោធិ៍សាត់ អាចបង្ក្រាបបានទេ? ៕ពាក់ព័ន្ធជុំវិញករណី ល្បែងស៊ីសងខាងលើនេះ មហាជន បានធ្វើការសំណូមពរដល់ លោកស ថេង ស្នងការខេត្តពោធិ៍សាត់ ពិសេស លោកខូយ រីដា ចៅហ្វាយខេត្តពោធ៍សាត់ សូមមេត្តាជួយបង្ក្រាបទីតាំងល្បែងស៊ីសងមាន់ជល់ តាមប្រព័ន្ធអនឡាញ ឲ្យមានប្រសិទ្ធភាព ក្នុងការអនុវត្ត នូវគោលនយោបាយភូមិ.ឃុំមានសុវត្ថភាព។